ପ୍ରଧାନମନ୍ତ୍ରୀ ପୁନଃ ନିଜ ବକ୍ତବ୍ୟରେ ଆକ୍ରମଣ ଜାରି ରଖି ଅଭିଯୋଗ କରିଛନ୍ତି ଯେ ମୁଖ୍ୟମନ୍ତ୍ରୀଙ୍କ ଉପରେ ଜଣେ ସୁପର ସିଏମ ହୋଇଗଲେଣି। ଯିଏ ଓଡ଼ିଶାକୁ ଜାଣିନି, ଯାହାର ଏଠାକାର ଭାଷା,ସଂସ୍କୃତି ଉପରେ ଧାରଣା ନାହିଁ। ତା ହାତକୁ ଓଡ଼ିଶା ଯିବା ଉଚିତ କି? ଓଡ଼ିଶାର ଶାସନ ଆଉଟସୋର୍ସ ହୋଇଗଲାଣି। ଓଡ଼ିଶାକୁ ରକ୍ଷା କରିବାର ଦାୟିତ୍ବ ଆପଣମାନଙ୍କର। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବରଗଡ଼ ନିକଟ ବରହାଗୁଡ଼ା ବିକାଶ ଭିନ୍ଟେଜ୍ ପଡ଼ିଆରେ ଅନୁଷ୍ଠିତ ଏକ ବିରାଟ ଜନସଭାରେ ଉଦବୋଧନ ଦେଇ ଏହା କହିଛନ୍ତି ।
ସେ କହିଛନ୍ତି, ୨୫ ବର୍ଷ ଭିତରେ ବିଜେଡି ସରକାର ଗରିବଙ୍କୁ ଗରିବୀରୁ ବାହାରକୁ ଆଣିପାରିଲାନାହିଁ । ସାରା ଓଡ଼ିଶାରେ ବିଜେଡି ସରକାର ପ୍ରତି ଲୋକଙ୍କ ପ୍ରବଳ ରାଗ ରହିଛି। ଓଡ଼ିଆରେ ମୋଦି କହିଛନ୍ତି ଆଉ କେତେ ଦିନ ସହିବ ଓଡ଼ିଶା। ନାଁ ନ ନେଇ ମୋଦି କହିଛନ୍ତି, ଓଡ଼ିଶା ବରବାଦ ହେଉଛି। ମୁଁ ଏଠାକୁ ବିଜେପି ପାଇଁ ଭୋଟ ମାଗିବାକୁ ଆସିନାହିଁ ବରଂ ଆଉଟସୋର୍ସ ଲୋକଙ୍କ ଠାରୁ ଓଡ଼ିଆଙ୍କୁ ବଞ୍ଚାଇବାକୁ ଆସିଛି ବୋଲି ସେ କହିଛନ୍ତି।