ପୁରୀ (ରିପୋର୍ଟ – ସମୀର ରଞ୍ଜନ ନାୟକ):ଅଦିନିଆ ରଥଯାତ୍ରାକୁ ନେଇ ଗଜପତି ମହାରାଜାଙ୍କ ପ୍ରେସମିଟ୍ । ଇସ୍କନର ଅଦିନିଆ ରଥ ଶ୍ରୀମନ୍ଦିର ପରମ୍ପରାର ଉଲ୍ଲଂଘନ କହିଲେ ଗଜପତି। ୯ ତାରିଖରେ ଆମେରିକାର ହ୍ୟୁଷ୍ଟନରେ ରଥଯାତ୍ରା ଆୟୋଜନ ହେଉଛି । ଚିଠି ଲେଖିବା ସତ୍ତ୍ବେ ଇସ୍କନ ମାନିଲାନି, ରଥ ଆୟୋଜନ କରୁଛି । ୩ ତାରିଖର ସ୍ନାନଯାତ୍ରାକୁ ବାତିଲ କଲେ କିନ୍ତୁ ରଥଯାତ୍ରା ଆୟୋଜନ କରୁଛନ୍ତି ।‘ରଥ ଯାତ୍ରା ଏକ ଖେଳ ଘର ନୁହେଁ। ଖୋଦ ଜଗନ୍ନାଥଙ୍କ ନିର୍ଦ୍ଦେଶକ୍ରମେ ନିର୍ଦ୍ଦିଷ୍ଟ ତିଥିରେ ରଥ ଯାତ୍ରା ଆୟୋଜିତ ହେଉଛି। ମାତ୍ର ଇସ୍କନ ପକ୍ଷରୁ ପ୍ରାୟ ମାସେ ଦୁଇ ମାସ ବ୍ୟବଧାନରେ ବିଶ୍ୱର ବିଭିନ୍ନ ସ୍ଥାନରେ ରଥ ଯାତ୍ରା ଆୟୋଜିତ ହେଉଛି। ଇସ୍କନ ଏହାକୁ ଏକ ପ୍ରଚାର ଯାତ୍ରା ଭାବେ ପରିଚାଳନା କରୁଛି। କିନ୍ତୁ ଏହାକୁ ଆଉ ବରଦାସ୍ତ କରାଯିବନି।’ରଥ ଯାତ୍ରା ପାଳନ ନେଇ ଇସ୍କନ କର୍ତ୍ତୃପକ୍ଷଙ୍କ ମନମାନୀ ବିରୋଧରେ ଆଜି ଏପରି ବର୍ଷିଛନ୍ତି ଗଜପତି ମହାରାଜା ଦିବ୍ୟସିଂହ ଦେବ।
ଏହା ଶ୍ରୀମନ୍ଦିର ପରମ୍ପରାର ଉଲ୍ଲଂଘନ ବୋଲି ଗଜପତି ମହାରାଜା କହିବା ସହ ଭୁଲ ନ ସୁଧାରିଲେ ବିକଳ୍ପ ବ୍ୟବସ୍ଥା ଗ୍ରହଣ କରାଯିବ ବୋଲି ଚେତାଇ ଦେଇଛନ୍ତି। ଆଜି ଏକ ସାମ୍ବାଦିକ ସମ୍ମିଳନୀରେ ଗଜପତି ମହାରାଜା ଶ୍ରୀମନ୍ଦିର ସଂସ୍କୃତି ସହ ଖେଳ ଖେଳୁଥିବା ଇସ୍କନ ପ୍ରତି କଠୋର ଆଭିମୁଖ୍ୟ ପୋଷଣ କରିଛନ୍ତି।ଏନେଇ ସେ କହିଛନ୍ତି, ଜଗନ୍ନାଥ ହେଉଛନ୍ତି ମୂଳ ବିଗ୍ରହ। ତାଙ୍କ ପରମ୍ପରା ଅତି ପ୍ରତିଷ୍ଠିତ ଓ ପ୍ରସିଦ୍ଧ। ପରମ୍ପରା ଅନୁଯାୟୀ ହିଁ ଆମେ ଜଗନ୍ନାଥଙ୍କ ପର୍ବ ପାଳନ କରିବା ଉଚିତ। କେବଳ ଦୁଇଟି ଉତ୍ସବରେ ମହାପ୍ରଭୁଙ୍କୁ ଗର୍ଭଗୃହରୁ ବାହାର କରାଯାଇପାରିବ।ତେଣୁ ତାଙ୍କ ପରମ୍ପରା ବିରୋଧୀ କାମ କରି ଇସ୍କନ ତରଫରୁ କେବଳ ପ୍ରଚାର ପାଇଁ ଏପରି ଅଦିନ ରଥ ଯାତ୍ରା ଆୟୋଜନ କରାଯାଉଛି।ଜଗନ୍ନାଥଙ୍କ ବିଗ୍ରହ ରଖିବା ତଥା ପୂଜାର୍ଚ୍ଚନା କରିବା ନିମନ୍ତେ ଆମେ କାହାକୁ ବାରଣ କରୁନୁ।
କିନ୍ତୁ ଏହାକୁ ବିଧି ଅନୁଯାୟୀ କରିବା ଉଚିତ। କିନ୍ତୁ ସେମାନେ ଏହାକୁ ପ୍ରଚାର ଯାତ୍ରା ଭାବେ ସମଗ୍ର ବିଶ୍ୱରେ ପରିଚାଳନା କରୁଛନ୍ତି। ଏହା ଆମ ଶାସ୍ତ୍ର ଓ ପରମ୍ପରା ବିରୋଧୀ କାମ। ତେଣୁ ଏହାକୁ ଆଉ ବରଦାସ୍ତ କରାଯିବନି କି ଆମେ ଆଉ ଚୁପ୍ ବସି ପାରିବୁନି ବୋଲି ଚେତାଇ ଦେଇଛନ୍ତି ଗଜପତି ମହାରାଜା।ଚିଠି ଲେଖିବା ସତ୍ତ୍ୱେ ଇସ୍କନ ମାନିଲାନି, ରଥଯାତ୍ରା ଆୟୋଜନ କରିବାକୁ ସଜବାଜ ହେଉଛି। ଗତ ୩ ତାରିଖରେ ସେମାନେ ସ୍ନାନଯାତ୍ରା କରିବାକୁ କହୁଥିବା ବେଳେ ବିରୋଧ କରିବାରୁ ତାହାକୁ ବାତିଲ କରିଛନ୍ତି। ଯଦି ମାନିବେନି ଆମ ପାଖରେ ଆଇନର ରାସ୍ତା ବ୍ୟତୀତ ବିକଳ୍ପ ନାହିଁ ବୋଲି କହିଛନ୍ତି ଗଜପତି।ଏଥିସହ ସେ କହିଛନ୍ତି, ଇସ୍କନ କର୍ତ୍ତୃପକ୍ଷ ସମଗ୍ର ବିଶ୍ୱରେ ଗୋଟିଏ ଦିନରେ ଜନ୍ମାଷ୍ଟମୀ ପାଳନ କରୁଛନ୍ତି। କିନ୍ତୁ ରଥ ଯାତ୍ରା ଭିନ୍ନ ଦିନରେ ପାଳନ କରି କାହିଁକି ବ୍ୟତିକ୍ରମ କରୁଛନ୍ତି ତାଙ୍କ ଆଭିମୁଖ୍ୟ ସ୍ପଷ୍ଟ ହୋଇ ପାରୁନି।