କରଞ୍ଜିଆ (ଜିତେନ୍ଦ୍ର ରାଜ) : ପୁଣି ଟ୍ରାପ କ୍ୟାମେରା ଦ୍ୱାରା ଠାବ କରି ଶିକାରୀ ଙ୍କୁ ବନବିଭାଗ ଧରିବାକୁ ସଫଳତା ପାଇଛି ଦୁଇଦିନ ପୂର୍ବରୁ ଟ୍ରାପକ୍ୟାମେରା ଦ୍ୱାରା ଠାବ କରି ଠାକୁରମୁଣ୍ଡା ଅଞ୍ଚଳର ୨ ଶିକାରୀ ଙ୍କ ସହିତ ବରାହା ମାଂସ ଜବତ କରିବା ପରେ ରେ ଆଜି ପୁଣି କରଞ୍ଜିଆ ବ୍ଲକ ଦୁଧିଆଣି ପଞ୍ଚାୟତ ରାମଯୋଡି ଗ୍ରାମରୁ ଆଜି ଶିମିଳିପାଳ ବନ୍ୟଜନ୍ତୁ (ଦକ୍ଷିଣ) କାର୍ଯ୍ୟାଳୟ ପକ୍ଷରୁ ସ୍ୱତନ୍ତ୍ର ଟିମ ଚଢ଼ାଉ କରି ୬ ଦୁର୍ଦ୍ଦାନ୍ତ ଶିକାରୀଙ୍କୁ ଗିରଫ କରିଥିବା ସୂଚନା ମିଳିଛି । ଗିରଫ ଅଭିଯୁକ୍ତଙ୍କ ନିକଟରୁ ଗୋଟିଏ ବାରାହା ଓ ଗୋଟିଏ ସମ୍ବରର ମାଂସକୁ ଜବତ କରାଯାଇଥିବା ବେଳେ ଶିକାରରେ ବ୍ୟବହୃତ ଧନୁ ଓ ତୀରଗୁଡିକୁ ମଧ୍ୟ ଜବତ କରାଯାଇଛି ।
କିଛିବର୍ଷ ପୂର୍ବରୁ ରାମଯୋଡି ଗ୍ରାମରୁ ୭୬ ପରିବାରକୁ ସ୍ୱତନ୍ତ୍ର ପୁନର୍ବସନ ଯୋଜନା ଅନ୍ତର୍ଗତରେ କରଞ୍ଜିଆ ବନଖଣ୍ଡ ଅଧିକାରୀ ପ୍ରସନ୍ନ କୁମାର ବେହେରା ଉଠାଇବା ପରେ ସେଠାରେ ଜଙ୍ଗଲ ସୃଷ୍ଟି କରାଯାଇଥିଲା । ରାମଯୋଡି ସଂଲଗ୍ନ ଅଞ୍ଚଳ ଶିମିଳିପାଳର କୋର ଅଞ୍ଚଳ ହୋଇଥିବା ଯୋଗୁଁ ଅଧିକାଂଶ ସମୟରେ ବାରାହା, ସମ୍ବର, ହରିଣ ପ୍ରଭୁତି ଦେଖାଯାଉଥିବା ଏବଂ ଉକ୍ତ ସ୍ଥାନରେ ଆଉ କିଛି ପରିବାର ରହିଯାଇଥିବା ଯୋଗୁଁ ବନ୍ୟଜନ୍ତୁଙ୍କ ଶିକାର ସହଜ ହୋଇଥିଲା । ନିକଟରେ ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ ପକ୍ଷରୁ ରାମଯୋଡି ସଂଲଗ୍ନ କୋର ଅଞ୍ଚଳରେ ଟ୍ରାପ କ୍ୟାମେରା ଗୁପ୍ତ ଭାବେ ଲଗାଯାଇଥିବା ଯୋଗୁଁ ଶିକାରୀମାନଙ୍କୁ ଧରିବାରେ ବିଭାଗ ସଫଳ ହୋଇଥିଲା ।
ଗିରଫ ଅଭିଯୁକ୍ତଙ୍କ ମଧ୍ୟରେ ଲାଗେନ୍ଦ୍ର ଗାଗରାଇ, ରାଇସିଙ୍ଗ ସିଂ ଖୁଣ୍ଟିଆ, ରାମଦାସ ଦେହୁରୀ, ବୁଧୁ କେରାଇ, ଖେଜୁରୀ ହେମ୍ବ୍ରମ ଏବଂ ଦୁବରାଇ ସିଂ ଖୁଣ୍ଟିଆ । ଅଭିଯୁକ୍ତମାନେ ରୀତିମତ ବନ୍ୟଜନ୍ତୁ ଶିକାର କରୁଥିବା ନେଇ ପୂର୍ବରୁ ବିଭାଗ ନିକଟରେ ଖବର ଥିଲା । ଆଜି ଶିମିଳିପାଳ ବନ୍ୟଜନ୍ତୁ(ଦକ୍ଷିଣ) ଉପନିର୍ଦ୍ଦେଶକ ଡ଼.ସମ୍ରାଟ ଗୌଡାଙ୍କ ନିର୍ଦ୍ଦେଶରେ ଅଭିଯୁକ୍ତମାନଙ୍କୁ ଗିରଫ କରାଯିବା ପରେ ସେମାନଙ୍କ ତଲାସୀ ନେବା ସମୟରେ ସେମାନଙ୍କ ନିକଟରୁ ଧନୁ, ତୀର, ବାରାହା ଓ ସମ୍ବର ମାଂସକୁ ଜବତ କରାଯାଇଥିଲା ।ଗିରଫ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଥିବା ଶିମିଳିପାଳ ବନ୍ୟଜନ୍ତୁ(ଦକ୍ଷିଣ) ଉପନିର୍ଦ୍ଦେଶକ ଡ଼.ସମ୍ରାଟ ଗୌଡା ସୂଚନା ଦେଇଛନ୍ତି ।