ବରଗଡ (ମୁକୁନ୍ଦ ଦାସ): ବରଗଡ଼ ଜିଲ୍ଳା ପ୍ରଶାସନ ଓ ଜିଲ୍ଲା ଶିକ୍ଷା ବିଭାଗର ମିଳିତ ଆନୁକୂଲ୍ୟରେ ସ୍ଥାନୀୟ ବରଗଡ଼ ସରକାରୀ ବାଳିକା ହାଇସ୍କୁଲ ପରିସରରେ ତ୍ରିଦିବସୀୟ ବାଲ୍ ଧନୁଯାତ୍ରା ଉଦଯାପିତ ହୋଇଯାଇଛି।ଜିଲ୍ଲା ଶିକ୍ଷା ଅଧିକାରୀ ଶ୍ରୀଯୁକ୍ତ ରାଧାକାନ୍ତ ଛତ୍ରୀଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ଅନୁଷ୍ଠିତ ଏହି ବାଲ୍ ଧନୁଯାତ୍ରାର ଉଦଯାପନୀ ଉତ୍ସବରେ ମୁଖ୍ୟ ଅତିଥି ଭାବରେ ବିଶ୍ଵ ପ୍ରସିଦ୍ଧ ବରଗଡ଼ ଧନୁଯାତ୍ରାର କଂସ ମହାରାଜ ଉପସ୍ଥିତ ରହି ଛାତ୍ରୀମାନଙ୍କର ଉଚ୍ଚକୋଟୀର ଅଭିନୟକୁ ପ୍ରଶଂସା କରି ମହିଳାମାନେ ସବୁବେଳେ ପୁରୁଷଙ୍କ ସହ ସମତୁଲ୍ୟ ବୋଲି ମତ ବ୍ୟକ୍ତ କରିଥିଲେ।ମହିଳାମାନେ ମଧ୍ୟ ଆଗାମୀ ବିଶ୍ଵ ପ୍ରସିଦ୍ଧ ଧନୁଯାତ୍ରାରେ କଂସ ଭୂମିକାରେ ଅଭିନୟ କରି ପାରିବେ ବୋଲି ଦୃଢ଼ ମତ ବ୍ୟକ୍ତ କରିଥିଲେ।
ସ୍ଵତନ୍ତ୍ର ଅତିଥି ଭାବରେ ବରଗଡ଼ ଉପ ଜିଲ୍ଲାପାଳ ଶ୍ରୀଯୁକ୍ତ ପ୍ରସନ୍ନ କୁମାର ପାଣ୍ଡେ,ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଶ୍ରୀଯୁକ୍ତ ଜ୍ୟୋତିକାନ୍ତ ସାହୁ, ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ସୁଶ୍ରୀ ଶାନ୍ତି ସୁନା, ବରଗଡ଼ ବ୍ଲକ ଶିକ୍ଷା ଅଧିକାରୀ ଡଃ ସୁରେନ୍ଦ୍ର କୁମାର ସାହୁ, ଭେଡେନ ବ୍ଲକ ଶିକ୍ଷା ଅଧିକାରୀ ମଛିନ୍ଦ୍ର କୁମାର ମଲ୍ଲିକ ଏବଂ ସୋହେଲା ବ୍ଲକ ଶିକ୍ଷା ଅଧିକାରୀ ଅମୃତା ସାହୁ ଯୋଗ ଦେଇଥିଲେ। ନିର୍ଦ୍ଦେଶକ ଶଙ୍କର ପଟ୍ଟନାୟକ, ନକୁଳ ବାଦୀ, ସୁଗ୍ରୀବର ବିଶି, ଗୋପାଳ ମିଶ୍ର,ତୁଳାରାମ ମହାନନ୍ଦ, ନ୍ୟାସନାଲ ସ୍କୁଲ ଅଫ୍ ଡ୍ରାମାର ରାମଚନ୍ଦ୍ର ସାହୁ ଏବଂ ଗଜେନ୍ଦ୍ର ନାୟକଙ୍କ ନିର୍ଦ୍ଦେଶନାରେ ବରଗଡ଼ ବାଳିକା ବିଦ୍ୟାଳୟର ୪୦ ଜଣ ଛାତ୍ରୀ ବାଲ୍ ଧନୁଯାତ୍ରାରେ ନିଖୁଣ ଭାବରେ ଅଭିନୟ କରି ଦର୍ଶକଙ୍କ ମନ ମୁଗ୍ଧ କରିଥିଲେ ।
ଉଦଯାପନୀ ସଭାରେ ଛାତ୍ରୀମାନଙ୍କ ମଧ୍ୟରେ ଫ୍ୟାନସି ଡ୍ରେସ ପ୍ରତିଯୋଗୀତା ଅନୁଷ୍ଠିତ ହୋଇଥିଲା । ଏଥିରେ ସ୍ଥାନୀୟ ବିଭିନ୍ନ ବିଦ୍ୟାଳୟରୁ ଶିକ୍ଷାର୍ଥୀ କଂସ, କୃଷ୍ଣ ଓ ରାଧା ଭୂମିକାରେ ଭାଗ ନେଇ ସମସ୍ତଙ୍କର ଦୃଷ୍ଟି ଆକର୍ଷଣ କରିଥିଲେ। ସ୍ଥାନୀୟ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟିତ୍ରୀ ଏବଂ ଜିଲ୍ଲାର ସମସ୍ତ କର୍ମଚାରୀମାନଙ୍କ ସକ୍ରିୟ ସହଯୋଗରେ ଏହି ତ୍ରିଦିବସୀୟ ବାଲ୍ ଧନୁଯାତ୍ରା ମହା ସମାରୋହରେ ଅନୁଷ୍ଠିତ ହୋଇଥିଲା।