ଭୁବନେଶ୍ୱର : ସେବାୟତଙ୍କ କଳି ଉପବାସରେ ପ୍ରଭୁ ଲିଙ୍ଗରାଜ । ନା ନୀତିକାନ୍ତି ହେଉଛି ନା ଭୋଗ ଲାଗୁଛି । ସେବାୟତଙ୍କ କଳି ଆଉ ୩ ଦିନ ହେଲା ଖାଡା ଉପାସରେ ପ୍ରଭୁ ଲିଙ୍ଗରାଜ । ନିଜ ନିଜ ଭିତରେ ବିବାଦ ଆଉ ସେପଟେ ପ୍ରଭୁ ଲିଙ୍ଗରାଜ ୩ ଦିନ କିଛି ଖାଇନାହାନ୍ତି । ବଡୁ ନିଯୋଗ, ମହାସୁଆର ଏବଂ ପୂଜାପଣ୍ଡାଙ୍କ ମଧ୍ୟରେ ଲାଗିଥିବା ବିବାଦ ଯୋଗୁ ଏଭଳି ସ୍ଥିତି ଉପୁଜିଛି ।
ବିବାଦର ସମାଧାନ ପାଇଁ ତିନି ସେବାୟତ ଗୋଷ୍ଠୀଙ୍କୁ ନେଇ ମନ୍ଦିର ପ୍ରଶାସନର ବୈଠକ ବିଫଳ ହୋଇଥିଲା । ସେବାୟତମାନେ ନିଜ ଜିଦ୍ରେ ଅଟଳ ରହିଥିବାରୁ ସମାଧାନର ବାଟ ବାହାରିପାରିନଥିଲା । ଏଥିଯୋଗୁ ପ୍ରଭୁ ଲିଙ୍ଗରାଜ ଏପର୍ଯ୍ୟନ୍ତ ଅପୂଜା ରହିଛନ୍ତି । ଭକ୍ତ ଓ ଶ୍ରଦ୍ଧାଳୁମାନେ ମନ୍ଦିର ଯାଇ କେବଳ ଦର୍ଶନ କରି ଫେରୁଛନ୍ତି । ପୂଜାର୍ଚ୍ଚନା କରିପାରୁ ନାହାନ୍ତି । ଯାହାକୁ ନେଇ ଭକ୍ତ ମହଲରେ ତୀବ୍ର ଅସନ୍ତୋଷ ଦେଖାଦେଇଛି ।
ତେବେ ଏହି ପ୍ରସଙ୍ଗରେ ଆଜି ପ୍ରତିକ୍ରିୟା ରଖିଛନ୍ତି ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ। ସେ କହିଛନ୍ତି ଆଜି ବୈଠକରେ ନିଶ୍ଚିତ ନିର୍ୟ୍ୟାସ ବାହାରିବ। ଦୁଇ ଦିନ ହେଲା ଠାକୁରଙ୍କ ନୀତିକାନ୍ତି ବନ୍ଦ କରିବା ଅତି ଦୁର୍ଭାଗ୍ୟଜନକ କଥା। ଯଦି ସେବାୟତ ନିଯୋଗଙ୍କ ସମସ୍ୟା ରହିଛି , ତେବେ ଆଲୋଚନା କରିବାର ଆବଶ୍ୟକତା ରହିଛି। ଆଲୋଚନା ନ କରି ମହାପ୍ରଭୁଙ୍କ ନୀତି ବନ୍ଦ କରିବା ଠିକ୍ ନୁହେଁ। ତେଣୁ ତର୍ଜମା ପରେ ଆବଶ୍ୟକ ପଡିଲେ କଠୋର କାର୍ୟ୍ୟାନୁଷ୍ଠାନ ନିଆଯିବ ବୋଲି ମନ୍ତ୍ରୀ କହିଛନ୍ତି।