ରାୟଗଡ଼ା (ଗୋପୀନାଥ ଗୌଡ଼): ରାୟଗଡ଼ା ଜିଲା ମୁନିଗୁଡା ବ୍ଲକ ଅମ୍ବାଦଳାର ଏକ ସୁନା ଦୋକାନ ସମ୍ମୁଖରୁ ଲୁଟ୍ ଘଟଣାରେ ରାୟଗଡା ଜିଲା ପୁଲିସକୁ ମିଳିଛି ବଡ ସଫଳତା। ଲୁଟ୍ ହୋଇଥିବା ୪୩୦ ଗ୍ରାମର ସୁନା ଅଳଙ୍କାର ଉଦ୍ଧାର କରିଛି ସ୍ବତନ୍ତ୍ର ପୁଲିସ ଟିମ। ଏହି ଘଟଣାରେ ଜଡ଼ିତ ଗଞ୍ଜାମ ଜିଲା ଆସିକା ଥାନା ଅଞ୍ଚଳର ଜଣେ ନାବାଳକକୁ ଗିରଫ କରି ବାଳ ସ୍ବଧାର ଗୃହ ପଠାଇଛି ପୁଲିସ। ତା ନିକଟରୁ ୪୩୧ ଗ୍ରାମ ସୁନା ଅଳଙ୍କାର ଜବତ ହୋଇଥିବା ବେଳେ ମୁଖ୍ୟ ଅଭିଯୁକ୍ତ ଫେରାର ଥିବା ରାୟଗଡା ଜିଲା ଆରକ୍ଷୀ ଅଧିକ୍ଷକ ସ୍ବାତି ଏସ କୁମାର ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି। ସନ୍ଧ୍ୟାରେ ଜିଲା ପୁଲିସ କାର୍ଯ୍ୟାଳୟରେ ଆୟୋଜିତ ସାମ୍ୱାଦିକ ସମ୍ମିଳନୀରେ ଏସପି କହିଲେ, ଗତ ଡିସେମ୍ବର ୯ ତାରିଖ ସକାଳ ୮ଟା ବେଳେ ଅମ୍ବାଦଳା ଗ୍ରାମର ସୁନା ଦୋକାନ ମାଲିକ ମହେଶ୍ୱର ନାୟକ ୫୦୦ ଗ୍ରାମ ସୁନା ଅଳଙ୍କାର ନେଇ ଦୋକାନ ଖୋଲିବାକୁ ପହଞ୍ଚିଥିଲେ।
ସେ ଦୋକାନ ଖୋଲିବା ସମୟରେ ଦୁଇ ଜଣ ଦୁର୍ବୁତ୍ତ ତାଙ୍କ ଠାରୁ ଅଳଙ୍କାର ବ୍ୟାଗ ଛଡ଼ାଇ ନେଇଥିଲେ। ଏ ନେଇ ତୁରନ୍ତ ମହେଶ୍ୱର ଅମ୍ବାଦଳା ପୁଲିସକୁ ସୂଚନା ଦେଇଥିଲେ। ଖବର ପାଇ ରାୟଗଡ଼ା ଏସଡିପିଓ ରଶ୍ମି ରଞ୍ଜନ ସେନାପତି ଓ ଅମ୍ବାଦଳା ଥାନା ଅଧିକାରୀ କଳ୍ପନା ବେହେରା ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ । ତାପରେ ଏସପିଙ୍କ ନିର୍ଦ୍ଦେଶରେ ରାୟଗଡ଼ା ଏସଡିପିଓ ରଶ୍ମି ରଞ୍ଜନ ସେନାପତି ଓ ବିଷମକଟକ ଏସଡିପିଓ ସନ୍ତୋଷିନୀ ଓରାମଙ୍କ ନେତୃତ୍ବରେ ଦୁଇଟି ଟିମ୍ ଗଠନ କରି ତଦନ୍ତ କରାଯାଇଥିଲା । ଏଥିରେ ୨ ଜଣ ଏସଡିପିଓ, ଅମ୍ବାଦଳା, ମୁନିଗୁଡା ଓ ଚାନ୍ଦିଲି ଥାନା ଅଧିକାରୀ, ୨ ଜଣ ଏସ ଆଇ, ଜଣେ ଏଏସ ଆଇ, ୨ କନେଷ୍ଟବଳଙ୍କ ସହ ୧୨ ଜଣିଆ ଟିମ୍ ଅଂଶ ଗ୍ରହଣ କରିଥିଲେ। ଗୁଇନ୍ଦା ସୂଚନା ଓ ସିସିଟିଭି ଫୁଟେଜ ଆଧାରରେ ଗଞ୍ଜାମ ଜିଲା ଆସିକା ଥାନା ଅଞ୍ଚଳରେ ଅଭିଯୁକ୍ତଙ୍କ ଘର ବୋଲି ଜଣାପଡିଥିଲା ।
ଏହାପରେ ଆସିକା ପୁଲିସ ସହାୟତାରେ ନାବାଳକକୁ ଧରିଥିଲା ପୁଲିସ। ହେଲେ ମୁଖ୍ୟ ଅଭିଯୁକ୍ତ ଫେରାର ହୋଇଯାଇଛି। ଏହି ଘଟଣାରେ ପୁଲିସ ୪୩୧ ଗ୍ରାମ ସୁନା ଅଳଙ୍କାର ଓ ଗୋଟିଏ ଟିଭିଏସ ଆପାଚି ବାଇକ ଜବତ କରିଛି । ଜବତ ସୁନା ଅଳଙ୍କାର ମଧ୍ଯରେ ଦୁଇ ପ୍ରକାର ସୁନା ହାର ୭ ଟି, ମଙ୍ଗଳ ସୂତ୍ର ଲକେଟ ୯ ଟି, ଦୁଇ ପ୍ରକାର ସୁନା ମୁଦି ୪୮ ଟି, ସୁନା ଚେନ୍ ୨ ଟି, ମଙ୍ଗଳସୂତ୍ର ପଦକ ୧୨ ଟି, କାନ ଫୁଲ ୨୭ ହଳ, ସୁନା ଲକେଟ ୨୬ଟି, କାନର ଟପ୍ ଓ ରିଂ ୬ ହଳ ରହିଛି।