ରାୟଗଡ (ଗୋପୀନାଥ ଗୌଡ଼): ରାୟଗଡ଼ ଜିଲ୍ଲା ଅଧିଷ୍ଠାତ୍ରୀ ଦେବୀ ମାଁ ମଝିଘରିଆଣି ମନ୍ଦିରକୁ ସୌନ୍ଦର୍ଯ୍ୟ କରଣ କରିବା ଆଳରେ ଗୋଟିଏ ସ୍ଥାନରେ ସେଲ୍ଫି ପଏଣ୍ଟ କରଯାଇଛି। କିନ୍ତୁ, ସେଠାରେ ମାଁ ମଝୀଘରିଆଣିଙ୍କ ନାମକୁ ଇଂରାଜୀ ଅକ୍ଷରରେ ଅତି ସଂକ୍ଷେପରେ “MGT” ବୋଲି ଲେଖା ଯାଇଛି। ଏହି ଲେଖାକୁ ରାୟଗଡ଼ ସହର ବାସି, ବୁଦ୍ଧିଜୀବୀ ଏବଂ ମନ୍ଦିରକୁ ଆସୁଥିଵା ଶ୍ରଦ୍ଧାଳୁ ଏହିଭଳି ଲେଖାକୁ ନା ପସନ୍ଦ କରିବା ସହ ତୀବ୍ର ନିନ୍ଦା କରିଛନ୍ତି। ଲୋକଙ୍କ କହିବା ମୁତାବକ ଯିଏ ପ୍ରଥମ କରି ମଝିଘରିଆଣି ମାଁ ଙ୍କ ଦର୍ଶନ ପାଇଁ ଆସିଥିବ, ସିଏ “MGT” ର ଅର୍ଥ କଣ ବୁଝିଵେ ବୋଲି ଯୁକ୍ତି ବାଢ଼ିଛନ୍ତି…!
ଏପରିକି ମନ୍ଦିର ମୁଖ୍ୟ ପ୍ରବେଶ ଦ୍ଵାରରେ ମଧ୍ୟ ଇଁରାଜୀ ଅକ୍ଷରରେ ମାଁ ମଝିଘରିଆଣିଙ୍କ ନାମ ଲେଖା ଯାଇଛି। ସରକାରଙ୍କ ନିର୍ଦ୍ଧେଶ ଅନୁସାରେ ଓଡ଼ିଶାରେ ଓଡ଼ିଆ ନାମ ଲେଖା ଫଳକ ବ୍ୟବହାର କରିବା ପାଇଁ ରାଜ୍ୟ ସରକାରଙ୍କ ନିର୍ଦ୍ଧେଶ ରହିଛି। ଏପରି ସ୍ଥଳେ ରାୟଗଡ଼ ଜିଲ୍ଳାର ମଝିଘରିଆଣି ମନ୍ଦିର ଚତୃପାର୍ଶ୍ଵରେ ଓଡ଼ିଆ ଲେଖାକୁ ବାଦ୍ ଦେଇ ଇଂରାଜୀ ଓ ତେଲୁଗୁ ଭାଷାର ନାମ ଫଳକ ଗୁଡିକ ଦେଖିବାକୁ ମିଳୁଛି। ଅନ୍ୟପଟେ ଏପ୍ରିଲ ୦୧ ତାରିଖରେ ଉତ୍କଳ ଦିବସ ୨୦୨୫ ପାଳନ ହୋଇଛି। ଏହି ଅବସରରେ ଓଡିଆ ପକ୍ଷ ୧୪ଦିନ ଧରି ପାଳନ କରାଯିବ ଓଡିଶା ସରକାରଙ୍କ ଓଡିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ପତ୍ର ସଂଖ୍ୟା ୨୦୬୧ ନିର୍ଦ୍ଧେଶନାମା ଅନୂଯାୟୀ ଭାଷା, ସାହିତ୍ୟ, ସଂସ୍କୃତି ଓ ପରମ୍ପରାକୁ ଗୁରୁତ୍ଵ ଦେବା ପାଇଁ ଓଡ଼ିଶା ସରକାରଙ୍କ ପକ୍ଷରୁ ବିଭିନ୍ନ ଜନସଚେତନତା କାର୍ଯ୍ୟକ୍ରମ କରାଯାଉଛି।
କିନ୍ତୁ, ରାୟଗଡ଼ ଜିଲ୍ଲାରେ ଏହାର ବିପରୀତ କାର୍ଯ୍ଯକଳାପ ଦେଖିବାକୁ ମିଳିଛି। ଏପରିକି କିଛି ସ୍କୁଲର ନାମ ଫଳକ ଇଂରାଜୀ ଅକ୍ଷରରେ ନାମ ଫଳକ ଲେଖା ଯାଇଛି। ଅନ୍ୟପଟେ କିଛି ସରକାରି କାର୍ଯ୍ୟାଳୟ ଗୁଡିକରେ ଓଡ଼ିଆରେ ଲେଖା ନାମ ଫଳକ ଓ ଓଡ଼ିଆ ଲେଖା ସୁଚନା ଫଳକ ଗୁଡ଼ିକୁ ଓଲଟାଇ ରଖିଥିବା ଦେଖିବାକୁ ମିଳୁଛି । ଏହା ଓଡ଼ିଆ ଅସ୍ମିତାକୁ କୁଠାରଘାତ କରୁଛି ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ଜୋର ଧରିଛି। ଓଡ଼ିଆଭାଷା ଓ ଓଡ଼ିଆ ପକ୍ଷ ପାଳନ ଅବସରରେ ଏହିସବୁ ସୁଧାର ନିମନ୍ତେ କେଉଁଭଳି ପଦକ୍ଷେପ ଗ୍ରହଣ କରାଯିବ, ନା କାଗଜ କଲମ ଓ ପ୍ରଚାର୍ ପ୍ରସାରରେ ସିମିତ ହୋଇ ରହିବ ଦେଖିବା ବାକି ରହିଲା।