ଅନୁଗୋଳ(ଅଜିତ କୁମାର ଭୋଇ) : ସହରର ବେଶ୍ ଜନଗହଳିପୂର୍ଣ୍ଣ ଅଞ୍ଚଳ ଅମଲାପଡ଼ାରେ ଏକ ବଡ଼ ଧରଣର ସେକ୍ସ ରାକେଟ୍ ଠାବ ହୋଇଛି। ଜଣେ ସ୍ୱର୍ଗତ ଅବସରପ୍ରାପ୍ତ ପୋଲିସ କର୍ମଚାରୀଙ୍କ ଘରେ ଦୀର୍ଘ ଦିନରୁ ଚାଲିଥିବା ଏହି ଦେହ ବ୍ୟବସାୟର ପର୍ଦ୍ଦାଫାଶ କରିଛି ଅନୁଗୋଳ ଟାଉନ ଥାନା ପୋଲିସ ଓ ସ୍ପେଶାଲ ସ୍କ୍ୱାଡ୍।ଗୁପ୍ତ ସୂଚନା ଆଧାରରେ ମଙ୍ଗଳବାର ସନ୍ଧ୍ୟାରେ ପୋଲିସ ଟିମ୍ ଉକ୍ତ ଘର ଉପରେ ଅତର୍କିତ ଚଢ଼ାଉ କରିଥିଲା।
ଚଢ଼ାଉ ବେଳେ ବାହାର ରାଜ୍ୟର ଦୁଇ ଯୁବତୀ, ଦୁଇ ଜଣ ଗ୍ରାହକ ଏବଂ ଘର ମାଲିକଙ୍କୁ ପୋଲିସ ହେପାଜତକୁ ନେଇଛି। ଘର ସମ୍ମୁଖରେ ଅବସରପ୍ରାପ୍ତ ପୋଲିସ କର୍ମଚାରୀଙ୍କ ନେମପ୍ଲେଟ୍ ଲାଗିଥିବାରୁ ଏହାକୁ ଆଳ କରି ଏଭଳି ଅନୈତିକ କାର୍ଯ୍ୟକଳାପ ଚାଲିଥିଲା। ଟାଉନ ଥାନା ଆଇଆଇସି ପ୍ରକାଶ ମାଝୀଙ୍କ ସୂଚନା ଅନୁସାରେ, ଏହି ରାକେଟ୍ ପଛରେ ଥିବା ଅନ୍ୟ ସହଯୋଗୀଙ୍କୁ ଧରିବା ପାଇଁ ସହରର ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି।
