ଆନ୍ଧ୍ରପ୍ରଦେଶର ପୂର୍ବ ଗୋଦାବରୀ ଜିଲ୍ଲା ଅନ୍ତର୍ଗତ ଗୋପାଳପୁରମ ପଞ୍ଚାୟତର ଜଗନ୍ନାଧପୁରମ ଗାଁ ନିକଟ ଚେକପୋଷ୍ଟରେ ଯାଞ୍ଚ ସମୟରେ ଏକ ଘରୋଇ ବସରୁ ନଗଦ ୨.୪୦ କୋଟି ଟଙ୍କା ଜବତ କରିଛି ପୋଲିସ । ଅନ୍ତଃଜିଲ୍ଲା ଚେକପୋଷ୍ଟ ନିକଟରେ ପୋଲିସ ଚେକିଂ କରୁଥିବା ସମୟରେ ବସ୍ ଭିତରୁ ମିଳିଛି ଏତେ ପରିମାଣ ର ନଗଦ ଟଙ୍କା ।
ସୂଚନା ପ୍ରକାଶ ଯେ , ଏହି ଘରୋଇ ଟ୍ରାଭେଲ ବସ ହାଇଦ୍ରାବାଦରୁ ବିଶାଖାପାଟଣା ଯାଉଥିଵା ସମୟରେ ପୋଲିସ ଯାଞ୍ଚରେ ଉପରୋକ୍ତ ଟଙ୍କା ଜବତ ହୋଇଥିଲା ।ସବୁଠୁ ଆଶ୍ଚର୍ଯ୍ୟଜନକ କଥା ହେଉଛି ଯେ ଆନ୍ଧ୍ରରେ ଟଙ୍କା ଧରାପଡିଥିବା ଉକ୍ତ ବସର ନମ୍ୱର OD 10 DW 4387 । ଅର୍ଥାତ ଏହି ବସଟି ଓଡ଼ିଶାରେ ପଞ୍ଜିକୃତ ହୋଇଥିଲା । ପୋଲିସ କହିବା ମୁତାବକ, ବସ କ୍ୟାବିନରୁ ବ୍ୟାଗ ଭର୍ତ୍ତି ଟଙ୍କା ମିଳିଛି ।
କର୍ନୁଲର ଆୟୁଲା ଚିନା ଚେନ୍ନାୟା ନାମକ ଜଣେ ବ୍ୟକ୍ତି ଏହି ଟଙ୍କା ନିଜ ସାଙ୍ଗରେ ନେଇ ଯାଉଥିଲେ । ତେବେ ସେ କାହାଠାରୁ ଏବଂ କେଉଁ କାରଣ ପାଇଁ ଏତେ ପରିମାଣର ଟଙ୍କା ନେଇ ଯାଉଥିଲେ ତାହା ପୋଲିସ ପଚାରିବାରୁ ସେ ସନ୍ତୋଷଜନକ ଉତ୍ତର ଦେଇପାରିନଥିଲେ ଫଳରେ ପୋଲିସର ସନ୍ଦେହଘେରକୁ ଆସିଥିଲେ ବ୍ୟକ୍ତିଜଣକ । ପୋଲିସ ବର୍ତ୍ତମାନ ଉକ୍ତ ଟଙ୍କାକୁ ଜବତ କରିବାସହିତ ବ୍ୟକ୍ତି ଜଣକୁ ଅଟକ ରଖି ପଚରା ଉଚରା କରୁଛି ।