ପୁରୀ :ପ୍ରତିବର୍ଷ ୧୫ ଦିନ ଅଣସରରେ ରହିଥାନ୍ତି ମହାପ୍ରଭୁ କିନ୍ତୁ ଚଳିତ ବର୍ଷ ୧୩ ଦିନ ଅଣସରରେ ରହିବେ ଶ୍ରୀଜିଉ । ୫୩ ବର୍ଷ ପରେ ଚଳିତ ଥର ୧୩ ଦିନ ପଡୁଛି ଅଣସର ନୀତି ।ଯେଉଁଦିନ ନେତ୍ରୋତ୍ସବ, ସେହିଦିନ ନବଯୌବନ ଦର୍ଶନ ଓ ଶ୍ରୀଗୁଣ୍ଡିଚା ଯାତ୍ରା । ହାତରେ ଦୁଇ ଦିନ କମ ଥିବାରୁ ନୀତିକାନ୍ତିକୁ ନେଇ ଚିନ୍ତାରେ ପଡ଼ିଛନ୍ତି ସେବାୟତ। ଏଭଳି ଅଡ଼ୁଆ ସ୍ଥିତିରେ ଚଳିତବର୍ଷ ଶ୍ରୀଗୁଣ୍ଡିଚା ଯାତ୍ରା ଦୁଇଦିନରେ ଶେଷ ହେବ ବୋଲି ସେବାୟତମାନେ ମତ ଦେଇଛନ୍ତି।
ଗୋଟିଏ ଦିନରେ ନେତ୍ରୋତ୍ସବ, ପହଣ୍ଡି ଲାଗି ସେନାପଟା ଓ କୁସୁମି ଲାଗି ଥିବାରୁ ଚିନ୍ତାରେ ପଡ଼ିଛନ୍ତି ସେବାୟତ ।୧୯୭୧ ମସିହାରେ ରଥଯାତ୍ରାରେ ଶ୍ରୀମନ୍ଦିର ନୀତିକାନ୍ତି ଆଧାରରେ ଚଳିତବର୍ଷର ନୀତିକାନ୍ତି କରିବାକୁ ଯୋଜନା କରାଯାଉଛି ।
ସେବାୟତଙ୍କ ଠାରୁ ପ୍ରକାଶ ଯେ ୧୩ ଦିନରେ ନୀତିକାନ୍ତି ସାରିବା କଷ୍ଟକରବ୍ୟାପାର । ସମସ୍ତ ନୀତିକାନ୍ତି ଯଦି ଠିକସମୟରେ ଚାଲେ ତେବେ ସେନାପଟା ଲାଗି ଶେଷ ହେବା ସକାଳ ପ୍ରାୟ ୭ଟାରୁ ୮ଟା ହୋଇଯିବ। ପରେ ଅନ୍ୟାନ୍ୟ ନୀତିକାନ୍ତି ସରି ପହଣ୍ଡି ହେଲା ବେଳକୁ ଦ୍ବିପ୍ରହର ହୋଇଯିବ। ପହଣ୍ଡି ସାରି ରଥଟଣା ହେଲା ବେଳକୁ ସଂଧ୍ୟା ହୋଇ ଯାଇଥିବ । ପ୍ରଥମେ ବଡ଼ଠାକୁରଙ୍କ ତାଳଧ୍ବଜ ରଥ ଟଣା ହେବାର ବିଧି ରହିଛି । ୧ମ ଦିନରେ ତେଣୁ ଵିଧି ରକ୍ଷା ଲାଗି ରଥ ଟଣାଯାଇ ୨ୟ ଦିନରେ ଗୁଣ୍ଡିଚା ମନ୍ଦିରରେ ପହଞ୍ଚିବ।