ଆଫଗାନିସ୍ତାନର ରାଜନୈତିକ ଅସ୍ଥିରତା ପାଇଁ ସାଧାରଣ ଜନଜୀବନ ସ୍ୱାଭାବିକ ନାହିଁ। ଆତଙ୍କବାଦ ପାଇଁ ଦେଶର ଆର୍ଥିକ ମେରୁଦଣ୍ଡ ଭାଙ୍ଗି ଯାଇଛି। କ୍ରୀଡା ଓ କ୍ରୀଡ଼ାବିତଙ୍କୁ ବାରମ୍ବାର ତାଲିବାନୀ ନିୟମର ଦ୍ୱାହି। ସେ ଭିତରେ ଅଫଗାନିସ୍ତାନ କ୍ରିକେଟ ଟିମ ଉନ୍ନତ କ୍ରୀଡା ପ୍ରଦର୍ଶନ କରୁଛି।ଗତ ଦିନିକିଆ ବିଶ୍ବକପ୍ରେ ଆଫ୍ଗାନିସ୍ତାନ ଚମତ୍କାର ପ୍ରଦର୍ଶନ କରିଛି। ଏହା ପଛରେ ପୂର୍ବତନ ଭାରତୀୟ କ୍ରିକେଟର୍ ଅଜୟ ଜାଡ଼େଜାଙ୍କ ଗୁରୁତ୍ବପୂର୍ଣ୍ଣ ଭୂମିକା ରହିଥିଲା। ଏହି କାର୍ଯ୍ୟ ପାଇଁ ଜାଡ଼େଜା କୌଣସି ପାଉଣା ନେବାକୁ ମନା କରିଦେଇଥିଲେ। ଆଫ୍ଗାନିସ୍ତାନ କ୍ରିକେଟ୍ ବୋର୍ଡ (ଏସିବି) ସିଇଓ ନସୀବ ଖାନ ଏହି ସତ୍ୟ ଉଜାଗର କରିଛନ୍ତି।
ସେ କହିଛନ୍ତି, ”୨୦୨୩ ଦିନିକିଆ ବିଶ୍ବକପ୍ରେ ଜାଡ଼େଜାଙ୍କ କାର୍ଯ୍ୟ ପାଇଁ ଆମେ ଅନେକ ଥର ତାଙ୍କୁ ଅର୍ଥ ଦେବାପାଇଁ ପ୍ରୟାସ କରିଛୁ । ହେଲେ ପ୍ରତ୍ୟେକ ଥର ଏହାକୁ ସେ ଏଡ଼ାଇ ଦେଇ କୁହନ୍ତି ‘ଯଦି ତୁମେ ଭଲ ଖେଳ, ଏହା ମୋ ପାଇଁ ଅର୍ଥ ଓ ପୁରସ୍କାର ସଦୃଶ”। ଭାରତରେ ଆୟୋଜିତ ଏହି ବିଶ୍ବକପ୍ ପୂର୍ବରୁ ଜାଡ଼େଜାଙ୍କୁ ଏସିବି ନିଯୁକ୍ତି କରିଥିଲା। ତାଙ୍କ ତତ୍ତ୍ବାବଧାନରେ ଦଳ ପୂର୍ବତନ ବିଜେତା ଇଂଲଣ୍ଡ ଓ ପାକିସ୍ତାନ ସହ ବାଂଲାଦେଶକୁ ପରାସ୍ତ କରିଥିଲା।