ପୁରୀ: ନୀତିରେ ଅହେତୁକ ବିଳମ୍ବ କାରଣରୁ ଦୁଇଦିନ ହେଲାଣି ଭକ୍ତମାନେ ମହାପ୍ରସାଦ ପାଇବାରୁ ବଞ୍ଚିତ ହେଉଛନ୍ତି । ନୀତି ବିଳମ୍ବ କାରଣରୁ ଗତକାଲି ପ୍ରାୟ ୩୦ହଜାର ଲୋକଙ୍କ ମହାପ୍ରସାଦ ଫିଙ୍ଗାଯାଇଛି। ଯାହାର ମୂଲ୍ୟ ୮ରୁ ୧୦ଲକ୍ଷ ଟଙ୍କା ହେବ। ଏହାକୁ ନେଇ ଶ୍ରୀମନ୍ଦିର ସୁଆର ମହାସୁଆର ନିଯୋଗ ଅସନ୍ତୋଷ ପ୍ରକାଶ କରିଛି। ତୁରନ୍ତ ନୀତିରେ ଶୃଙ୍ଖଳା ଆଣିବା ସହ ନଷ୍ଟ ହୋଇଥିବା ମହାପ୍ରସାଦର କ୍ଷତି ଭରଣା କରିବାକୁ ନିବେଦନ କରିଛି।ଗତ ୧୦ ତାରିଖରେ ନୀତି ବିଳମ୍ବ କାରଣରୁ ପହୁଡ଼ ହୋଇନଥିଲା। ବିନା ପହୁଡ଼ରେ ଗତକାଲିର ନୀତିକାନ୍ତି ଆରମ୍ଭ ହୋଇଥିଲା।
ସକାଳ ପ୍ରାୟ ୭ଟା ୨୫ରେ ମଙ୍ଗଳ ଆଳତି ହୋଇଥିଲା। ସେହି ଅନୁସାରେ ଅନ୍ୟାନ୍ୟ ନୀତି ବିଳମ୍ବ ହୋଇଥିଲା । ସକାଳଧୂପ ମଧ୍ୟାହ୍ନ ୧୨ଟା ୪୫ରେ ଶେଷ ହୋଇଥିଲା। ଅପରାହ୍ଣ ୩ଟା ୧୦ରେ ପ୍ରଥମ ଭୋଗମଣ୍ଡପ ଶେଷ ହୋଇଥିଲା। ଏଣୁ ମହାପ୍ରସାଦ ବାହାରିବା ବିଳମ୍ବ ହୋଇଥିଲା। ଅପରାହ୍ଣ ପ୍ରାୟ ୪ରେ ମହାପ୍ରସାଦ ବାହାରିଥିଲା। ମଧ୍ୟାହ୍ନ ଧୂପ ରାତି ୮ଟା ୪୦ରେ ଶେଷ ହୋଇଥିଲା।
ଏଣୁ ଦ୍ବିତୀୟ ଭୋଗମଣ୍ଡପ ରାତି ୧୦ଟା ୧୦ରେ ଶେଷ ହୋଇଥିଲା। ମହାପ୍ରସାଦ ବାହାରିବା ବେଳକୁ ରାତି ପ୍ରାୟ ୧୧ଟା ହୋଇଯାଇଥିଲା। ଗତକାଲି ନୀତି ବିଳମ୍ବ କାରଣରୁ ଭୋର୍ ୫ଟାରେ ରାତ୍ରପହୁଡ଼ ହୋଇଥିଲା। ଏଣୁ ଦ୍ବାରଫିଟା ବିଳମ୍ବ ହୋଇଥିଲା। ସକାଳ ପ୍ରାୟ ୭ଟା ୪୦ରେ ଦ୍ବାରଫିଟା ନୀତି ହୋଇଥିଲା। ସେହି ଅନୁସାରେ ଅପରାହ୍ଣ ୪ଟାରେ ପ୍ରଥମ ଭୋଗମଣ୍ଡପ ନୀତି ଶେଷ ହୋଇଥିଲା।
ଏଣୁ ମହାପ୍ରସାଦ ବାହାରିବା ଅପରାହ୍ଣ ୫ଟା ହୋଇଯାଇଥିଲା। ସେହି ଅନୁସାରେ ଦ୍ବିତୀୟ ଭୋଗମଣ୍ଡପ ବିଳମ୍ବ ହୋଇଛି। ସୁଆର ମହାସୁଆର ନିଯୋଗ ସଂପାଦକ ନାରାୟଣ ମହାସୁଆର କହିଛନ୍ତି, ବରାଦି ଭୋଗ ଓ ଭକ୍ତଙ୍କୁ ମିଶାଇ ଆମେ ପ୍ରତିଦିନ ପ୍ରାୟ ଦେଢ଼ ଲକ୍ଷ ଲୋକଙ୍କ ପାଇଁ ମହାପ୍ରସାଦ ପ୍ରସ୍ତୁତ କରୁଛୁ। ଆଜି ବି ନୀତି ବିଳମ୍ବ କାରଣରୁ ପ୍ରଥମ ଭୋଗମଣ୍ଡପ ବିଳମ୍ବରେ ବାହାରିଛି।
ସମୀର ରଞ୍ଜନ ନାୟକଙ୍କ ରିପୋର୍ଟ