ପୁରୀ (ରିପୋର୍ଟ-ସମୀର ରଞ୍ଜନ ନାୟକ) : କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ରେଭେନ୍ସା ବିଶ୍ଵବିଦ୍ୟାଳୟର ନାମ ପରିବର୍ତନ ପାଇଁ ଦେଇଥିବା ପ୍ରସ୍ତାବ ଅତ୍ୟନ୍ତ ଦୁର୍ଭାଗ୍ୟଜନକ ଓ ଏହ ପଛରେ ସାମ୍ପ୍ରଦାୟିକ ଓ ସଂଖ୍ୟାଲଘୁ ବିରୋଧୀ ମନୋଭାବ ସମ୍ପୂର୍ଣ ଭାବେ ସ୍ପଷ୍ଟ ବୋଲି ଭାରତର ଛାତ୍ର ଫେଡେରେସନ୍ ପକ୍ଷୁରୁ କୁହାଯାଇଛି ।କେନ୍ଦ୍ରମନ୍ତ୍ରୀଙ୍କ ପ୍ରସ୍ତାବକୁ ବିରୋଧ କରି ସଙ୍ଗଠନ ପକ୍ଷରୁ ପୁରୀ ସାମନ୍ତ ଚନ୍ଦ୍ର ଶେଖର ମହାବିଦ୍ୟାଳୟ ସମ୍ମୁଖରେ ଏକ ବିକ୍ଷୋଭ ଓ ପ୍ରତିବାଦ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।ଅତୀତରେ କେନ୍ଦ୍ର ସରକାର ଯେପରି ସାଂପ୍ରଦାୟିକ ମନୋଭାବ ରଖି ଅନେକ ସହର ଓ ରେଳ ଷ୍ଟେସନ ନାମ ପରିବର୍ତ୍ତନ କରି ଦେଶରେ ହିନ୍ଦୁ ମୁସଲମାନ ମଧ୍ୟରେ ବିଦ୍ୱେଷ ସୃଷ୍ଟି କରିଛନ୍ତି ଓଡ଼ିଶାରେ ସେହି ଧରଣର ପ୍ରୟାସ ପାଇଁ କେନ୍ଦ୍ର ମନ୍ତ୍ରୀ କରୁଛନ୍ତି ବୋଲି ଏସ ଏଫ୍ ଆଇ ଅଭିଯୋଗ କରିଛି ।
ଟି ଇ ରେଭେନ୍ସା ନାମରେ ୧୮୬୮ ମସିହାରରେ ପ୍ରତିଷ୍ଠିତ ଏହି ପୁରୁଣା ଶିକ୍ଷାନୁଷ୍ଠାନ ଓଡ଼ିଶାର ଅନେକ ରାଜନୈତିକ ଓ ସାଂସ୍କୃତିକ ଇତିହାସର ମୂକସାକ୍ଷୀ । ରେଭେନ୍ସା ବିଶ୍ୱବିଦ୍ୟାଳୟ ନାମ ପଛରେ ବହୁ ଐତିହ୍ୟ ଓ ଗୌରବ ରହିଛି । ରେଭେନସା ବିଶ୍ଵବିଦ୍ୟାଳୟ ସମେତ ବହୁ ପ୍ରଖ୍ୟାତ ଉଚ୍ଚ ଶିକ୍ଷାନୁଷ୍ଠାନର ଶୈକ୍ଷିକ ସ୍ଥିତି ଅତି ଦୟନୀୟ ଥିବା ବେଳେ ମନ୍ତ୍ରୀ ମହୋଦୟ ମୂଳ ପ୍ରସଙ୍ଗରୁ ଦୃଷ୍ଟି ହଟେଇବା ପାଇଁ ଶିକ୍ଷାନୁଷ୍ଠାନ ନାମ ନେଇ ଶସ୍ତା ରାଜନୀତି କରୁଛନ୍ତି ।ଘରୋଇ କାରଣ ଓ ବ୍ୟଵସାୟିକରଣ ଶିକ୍ଷାର ଧ୍ବଂସ ସାଧନ କରୁଛି ।ଗତ ୧୦ ବର୍ଷର ଶାସନରେ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ ଓ ରେଭେନ୍ସା ବିଶ୍ଵବିଦ୍ୟାଳୟ ଭଳି ଗୋଟେ ହେଲେ ଉଚ୍ଚ ମାନର ଶିକ୍ଷାନୁଷ୍ଠାନ ପ୍ରତିଷ୍ଠା କରିବାରେ ବ୍ୟର୍ଥ ହୋଇଥିବା ବି ଜେ ପି ସରକାର ଶସ୍ତା ଲୋକପ୍ରିୟତା ଓ ହୀନ ରାଜନୈତିକ ଫାଇଦା ପାଇଁ ଏଭଳି ପ୍ରସ୍ତାବ ଦେଇଛନ୍ତି ।
ଗତ ଦଶନ୍ଧିରେ ଶିକ୍ଷା ବ୍ୟୟ ହ୍ରାସ ସହ ଛାତ୍ର ବୃତ୍ତି , ଗବେଷଣା , ପତ୍ର ପତ୍ରିକା , ସେମିନାର ବାବଦରେ ବ୍ୟୟ କମିଛି । ବହୁ ଉଚ୍ଚ ଶିକ୍ଷାନୁଷ୍ଠାନ ଆର୍ଥିକ ସଙ୍କଟ ଦେଇ ଗତି କରୁଛନ୍ତି । ଗତ ୧୦ ବର୍ଷ ଭିତରେ କେନ୍ଦ୍ର ସରକାର ଓଡ଼ିଶାରେ ଶିକ୍ଷାର ବିକାଶ କଣ କରିଛନ୍ତି ତାର ହିସାବ ଫର୍ଦ୍ଦ ଦେବାକୁ ଏସ ଏଫ୍ ଆଇ ଦାବୀ କରିଛି ।ଆଜିର ପ୍ରତିବାଦ ସଭାରେ ରାଜ୍ୟ ଉପଦେଷ୍ଟା ପ୍ରାଧ୍ୟାପକ ସୁରେନ୍ଦ୍ର କୁମାର ଜେନା , ଜିଲ୍ଲା ଆବାହକ ଚନ୍ଦନ ସାହୁ, ଛାତ୍ର ନେତା ମାନସ ରଞ୍ଜନ ଦଳବେହେରା,ରାକ୍ଷୀ ସ୍ୱାଇଁ, ଅମ୍ବିକା ପ୍ରିୟଦର୍ଶିନୀ, ଦିପାଞ୍ଜଳୀ ବେହେରା ପ୍ରିୟଙ୍କା ଦେଓ, ଶ୍ରାବଣୀ ଦାସ, ସିଦ୍ଧାନ୍ତ ରାଉତ ପ୍ରମୁଖ ନେତୃତ୍ବ ନେଇଥିଲେ ।