ପୁରୀ (ରିପୋର୍ଟ – ସମୀର ରଞ୍ଜନ ନାୟକ ):ପ୍ରବୀଣ ବାମପନ୍ଥୀ ନେତା ସୀତାରାମ ୟେଚୁରୀଙ୍କ ସମଗ୍ର ଜୀବନ ଶୋଷିତ ମଣିଷର ସଂଗ୍ରାମରେ ଉତ୍ସର୍ଗୀକୃତ ଥିଲା ଓ ସେ ଉଚ୍ଚ ମୂଲ୍ୟବୋଧ ରାଜନୀତିର ଅଗ୍ରଣୀ ସ୍ୱର ଓ ସ୍ୱାକ୍ଷର ଥିଲେ ବୋଲି ଏସ ଏଫ୍ ଆଇ ପକ୍ଷରୁ କୁହାଯାଇଛି ।ଭାରତର ଛାତ୍ର ଫେଡେରେସନ୍ ( ଏସ ଏଫ୍ ଆଇ) ପକ୍ଷରୁ ସୀତାରାମ ୟେଚୁରୀଙ୍କ ସ୍ମୃତି ଚାରଣ ପାଇଁ ଆୟୋଜିତ ଏକ ଶ୍ରଦ୍ଧାଂଜଳି ସଭାରେ ମୁଖ୍ୟବକ୍ତା ଭାବେ ଯୋଗଦେଇ ରାଜ୍ୟ ଉପଦେଷ୍ଟା ପ୍ରାଧ୍ୟାପକ ସୁରେନ୍ଦ୍ର କୁମାର ଜେନା କହିଲେ ଯେ ଅତି ଉଚ୍ଚକୋଟୀର ମେଧାବୀ ଛାତ୍ର ଭାବେ ଆତ୍ମୋନ୍ନତି ପଥକୁ ପରିହାର କରି ଶୋଷଣମୁକ୍ତ ସମାଜ ଗଠନର ରାଜନୀତି ଓ ଦର୍ଶନକୁ ବ୍ରତ ଭାବେ ଗ୍ରହଣ କରି ନିପିଡିତ ମଣିଷର ସଂଗ୍ରାମରେ ନିଜକୁ ଉତ୍ସର୍ଗ କରିଥିଲେ ।
ଜବାହରଲାଲ ନେହେରୁ ବିଶ୍ୱବିଦ୍ୟାଳୟ ଛାତ୍ର ସଂସଦ ୟୁନିୟନର ସଭାପତି ଭାବେ ନିଜର ରାଜନୈତିକ ଜୀବନ ଆରମ୍ଭ କରି ଏସ ଏଫ୍ ଆଇ ର ସର୍ବଭାରତୀୟ ସଭାପତି ହେବା ପରେ ଦେଶର ଜଣେ ଅଗ୍ରଗଣ୍ୟ ଛାତ୍ରନେତା ଭାବେ ସ୍ୱୀକୃତି ପାଇଲା ପରେ ତାଙ୍କର ଜାତୀୟ ଖ୍ୟାତି ବଢ଼ିଥିଲା । ଛାତ୍ର ରାଜନୀତି ପରେସି ପି ଆଇଏମ୍ ଦଳରେ ଯୋଗ ଦେଇ ଆଦର୍ଶ ପ୍ରତି ନିଷ୍ଠା, ଶତାଧିକ ସଂଗ୍ରାମରେ ନେତୃତ୍ବ ନେଇ ମୃତ୍ୟୁ ବେଳକୁ ପାର୍ଟିର ସର୍ବୋଚ୍ଚ ପଦବୀରେ ରହିଥିଲେ । ଜଣେ ଶ୍ରେଷ୍ଠ ସାଂସଦ, ଉଚ୍ଚକୋଟୀର ଲେଖକ ଓ ମୂଲ୍ୟବୋଧ ରାଜନୀତିର ଗୌରବାଜ୍ଵଳ। ଛାପ ଛାଡ଼ି ଯାଇଛନ୍ତି । ସାଥୀ ସୀତାରାମ ୟେଚୁରୀ ସାମ୍ପ୍ରଦାୟିକ ଫାଶୀବାଦ ରାଜନୀତି ବିରୁଦ୍ଧରେ ସମସ୍ତ ଗଣତାନ୍ତ୍ରିକ ଓ ଧର୍ମନିରପେକ୍ଷ ଶକ୍ତିଙ୍କୁ ଏକଜୁଟ କରିବାରେ ଅଗ୍ରଗଣ୍ୟ ଭୂମିକା ନେଇଥିଲେ ।ରାଜ୍ୟ ଆବାହକ ଶୁଭ୍ରାଂଶୁ ଶେଖର ଉଦଗାତା କହିଲେ ଯେ ରାଷ୍ଟ୍ର ପ୍ରୋତ୍ସାହିତ ଶିକ୍ଷା ସପକ୍ଷରେ ଲଢେଇ ଜାରି ରଖିଥିଲେ । ଶିକ୍ଷାର ବ୍ୟବସାୟୀକରଣ ଓ ଘରୋଇକରଣ ଯୋଗୁଁ କୋଟି କୋଟି ଛାତ୍ର ଉଚ୍ଚଶିକ୍ଷାରୁ ବଞ୍ଚିତ ହେଉଛନ୍ତି ।
ସୀତାରାମ ୟେଚୁରୀ ବୃହତ୍ତର ଜନ ଆନ୍ଦୋଳନ ସହ ଶିକ୍ଷାର ଅଧିକାର ପାଇଁ ସଂଗ୍ରାମ କରୁଥିଲେ । ଦେଶର ରାଜନୀତି ଅପରାଧ ଓ ଦୁର୍ନିତୀ ବୃଦ୍ଧି ଯୋଗୁଁ ରାଜନୀତି ପ୍ରତି ଲୋକଙ୍କ ଅନାଗ୍ରହ ବଢୁଥିବା ବେଳେ ସୀତାରାମଙ୍କ ଭଳି ନିଷ୍କଳଙ୍କ ରାଜନୀତିଜ୍ଞ ଦେଶ ପାଇଁ ଅଧିକ ଜରୁରି ବୋଲି ଓଡ଼ିଶା ମାଧ୍ୟମିକ ଶିକ୍ଷକ ସଂଘର ପ୍ରାକ୍ତନ ସାଧାରଣ ସମ୍ପାଦକ ପ୍ରକାଶ କୁମାର ମହାନ୍ତି ଓ ପ୍ରାଥମିକ ଶିକ୍ଷକ ସଂଘ ନେତାଶରତ କୁମାର ସେଠୀ ମତ ଦେଇଥିଲେ । ଜିଲ୍ଲା ଆବାହକ ଚନ୍ଦନ କୁମାର ସାହୁ ସଭାପତିତ୍ବ କରିଥିଲେ । ଅନ୍ୟମାନଙ୍କ ମଧ୍ୟରେ ଶିକ୍ଷକ ନେତା ବ୍ରହ୍ମାନନ୍ଦ ମହାରଣା , ଛାତ୍ର ନେତା ସୌମ୍ୟ ରଞ୍ଜନ ଦଳବେହେରା , ମୋନାଲିସା ମହାରଣା ଓ ମାନସ ରଞ୍ଜନ ଦଳବେହେରା, ପ୍ରିୟଙ୍କା ଦେଓ, ଅମ୍ବିକା ପ୍ରିୟଦର୍ଶିନୀ ପ୍ରମୁଖ ଉପସ୍ଥିତ ଥିଲେ ।