ଭୁବନେଶ୍ୱର :ଭାରତୀୟ ମାନକ ବ୍ୟୁରୋ ଭୁବନେଶ୍ଵର ଶାଖା ତରଫରୁ ସ୍ଥାନୀୟ କିଟ୍ ବିଶ୍ୱବିଦ୍ୟାଳୟର ଅଡିଟୋରିୟମରେ ମାନକ ମହୋତ୍ସବ – ୨୦୨୪ ଅନୁଷ୍ଠିତ ହୋଇଯାଇଛି। ଏହି ଅବସରରେ ମୁଖ୍ୟ ଅତିଥି ଭାବରେ ଓଡ଼ିଶା ସରକାରଙ୍କ ଖାଦ୍ୟ ଯୋଗାଣ ଓ ଉପଭୋକ୍ତା ତଥା ବିଜ୍ଞାନ ଓ ପ୍ରଯୁକ୍ତି ବିଦ୍ୟା ବିଭାଗୀୟ ମନ୍ତ୍ରୀ ଶ୍ରୀଯୁକ୍ତ କୃଷ୍ଣଚନ୍ଦ୍ର ପାତ୍ର ଯୋଗ ଦେଇ ଆନୁଷ୍ଠାନିକ ଭାବରେ ଉଦଘାଟନ କରିଥିଲେ। ସମ୍ମାନିତ ଅତିଥି ଭାବରେ କିଟ୍ ବିଶ୍ୱବିଦ୍ୟାଳୟର କୁଳପତି ପ୍ରାଧ୍ୟାପକ ଡଃ ସରନଜିତ୍ ସିଂ ଏବଂ ରେଭେନସା ବିଶ୍ଵବିଦ୍ୟାଳୟର କୁଳପତି ପ୍ରାଧ୍ୟାପକ ଡଃ ସଂଜୟ କୁମାର ନାୟକ ଯୋଗ ଦେଇ କୃତ୍ରିମ ବୁଦ୍ଧିମତ୍ତା ମାଧ୍ୟମରେ ବିଶ୍ଵ ମାନକ ଦିବସର ପ୍ରସଙ୍ଗ ଉଦ୍ୟୋଗ, ନବୀକରଣ ଏବଂ ଢାଞ୍ଚାଗତ ଉନ୍ନତି ବିଷୟରେ ନିଜର ଦୃଷ୍ଟିକୋଣ ବିନିମୟ କରିଥିଲେ।
୨୦୨୪ର ଗ୍ଲୋବାଲ ଥିମ୍ “ଏକ ଉତ୍ତମ ବିଶ୍ଵ ଗଠନ ପାଇଁ ସଂଯୁକ୍ତ ଦୃଷ୍ଟିକୋଣ “କୁ ଅନୁସରଣ କରି ବିଆଇଏସର ଭୁବନେଶ୍ୱର ଶାଖା ତରଫରୁ ଶିକ୍ଷାନୁଷ୍ଠାନମାନଙ୍କରେ ମାନକ କ୍ଲବର ଗୁଣାତ୍ମକ ସଂଯୋଗ,ମାନକ କ୍ଲବର ବିଭିନ୍ନ କାର୍ଯ୍ୟକ୍ରମ,କିସ୍ ଏବଂ କିଟ୍ ବିଶ୍ୱବିଦ୍ୟାଳୟ ଛାତ୍ରଛାତ୍ରୀମାନଙ୍କ ସହ ୱାକାଥନ୍ ଏବଂ ସେମିନାର ଆଦି ବିଭିନ୍ନ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ବିଶ୍ଵ ମାନକ ଦିବସରେ ଆୟୋଜିତ ବିଜ୍ଞାନ ପ୍ରଦର୍ଶନୀରେ ସର୍ବଶ୍ରେଷ୍ଠ ମଡେଲ ଓ ପୋଷ୍ଟର ପ୍ରଦର୍ଶନ କରିଥିବା କୃତୀ ପ୍ରତିଯୋଗୀମାନଙ୍କୁ ପୁରସ୍କୃତ କରାଯାଇଥିଲା।ବିଆଇଏସ ଭୁବନେଶ୍ୱରର ଯୁଗ୍ମ ନିର୍ଦ୍ଦେଶକ ଶ୍ରୀ ଦୀପକ ପାତ୍ର ଏସଡିଜି -୯ ସଂପର୍କରେ ବିଷୟରେ ଧାରଣା ପ୍ରଦାନ କରିଥିଲେ। ଟେକନିକାଲ ଅଧିବେଶନରେ କିଟ ର ମେକାନିକାଲ ଇଂଜିନିୟରିଂ ବିଭାଗର ସହାୟକ ପ୍ରାଧ୍ୟାପକ ଶ୍ରୀ ଅନୀଶ ପାଣ୍ଡେ,ଭୁବନେଶ୍ଵର ସ୍ଥିତ ଇନଷ୍ଟିଚ୍ୟୁଟ ଅଫ କ୍ୱାଲିଟି ଏଣ୍ଡ ଇନଭାଇରନମେଣ୍ଟ ସର୍ଭିସେସ୍ ର ନିର୍ଦ୍ଦେଶକ ତଥା ହେଡ୍ ଅଫ ବିଜିନେସ ଏକ୍ସେଲେନ୍ସ ଶ୍ରୀ ସୁବ୍ରତ ପାଣିଗ୍ରାହୀ,ସମ୍ୱଲପୁର ସ୍ଥିତ ଜେଏସଡବ୍ଲୁ ବିପିଏସଏଲ୍ ର ନିର୍ଦ୍ଦେଶକ ଶ୍ରୀ ମୁକେଶ ପଣ୍ଡା ଏବଂ ଭୁବନେଶ୍ଵର ସ୍ଥିତ ନ୍ୟାସନାଲ୍ ଇନଫର୍ମାଟିକସ୍ ସେଣ୍ଟରର ବୈଜ୍ଞାନିକ ଶ୍ରୀ ନୀଳାଦ୍ରି ବିହାରୀ ମହାନ୍ତି ନିଜର ଦୃଷ୍ଟିକୋଣ ବିନିମୟ କରିବା ସହିତ ପରିବର୍ତ୍ତନ, ଉଦ୍ୟୋଗ ଓ ଢାଞ୍ଚାଗତ ଉନ୍ନତିରେ ଏଆଇର ଭୂମିକା ସମ୍ପର୍କରେ ଆଲୋଚନା କରିଥିଲେ।
ବିଆଇଏସ୍ ହଲମାର୍କ ଏବଂ ଆଇଏସଆଇ ମାର୍କ ବିଷୟରେ ଜନ ସାଧାରଣଙ୍କ ମଧ୍ୟରେ ସଚେତନତା ଆଣିବା ପାଇଁ କିଟ୍ ବିଶ୍ୱବିଦ୍ୟାଳୟର ଛାତ୍ରଛାତ୍ରୀ ଏକ ନୁକ୍କଡ ନାଟକ ସହ ସାଂସ୍କୃତିକ କାର୍ଯ୍ୟକ୍ରମ ପ୍ରଦର୍ଶନ କରିଥିଲେ। ଆୟୋଜିତ କୁଇଜ୍ ପ୍ରତିଯୋଗୀତାର ସଠିକ ଉତ୍ତରଦାତାଙ୍କୁ ପୁରସ୍କୃତ କରାଯାଇଥିଲା। ଉଦ୍ୟୋଗଗୁଡିକୁ ସମ୍ମାନିତ କରାଯାଇଥିଲା। ଅସାଧାରଣ ପ୍ରତିଭା ପ୍ରଦର୍ଶନ କରିଥିବା ମାର୍ଗ ଦର୍ଶକ ବିଜ୍ଞାନ ଶିକ୍ଷକ ସଞ୍ଜୟ ଖମାରୀ ଏବଂ ସାଧନ କର୍ମୀ ଶ୍ରୀ ରଂଜନ କୁମାରଙ୍କୁ ମୁଖ୍ୟ ଅତିଥି ମାନପତ୍ର ସହ ଟ୍ରଫି ପ୍ରଦାନ କରିଥିଲେ। ବିଆଇଏସ୍ ଭୁବନେଶ୍ଵରର ଯୁଗ୍ମ ନିର୍ଦ୍ଦେଶକ ଶ୍ରୀ ଅର୍କ ସାହା କାର୍ଯ୍ୟକ୍ରମ ପରିଚାଳନା କରିଥିବା ବେଳେ ମାନକ କାର୍ଯ୍ୟକ୍ରମ ପରାମର୍ଶଦାତା ରଜନୀ ପନୱାର ଏବଂ ଶ୍ରୀ ସଂଜୀବ କୁମାର ନାୟକ ଧନ୍ୟବାଦ ଅର୍ପଣ କରିଥିଲେ ।