ଜାପାନର ସାକୁରା କାର୍ଯ୍ୟକ୍ରମରେ ଯୋଗ ଦେବେ କେଶାଇପାଲି ହାଇସ୍କୁଲର ଛାତ୍ରୀ

ବରଗଡ଼ (ମୁକୁନ୍ଦ ଦାସ) : ବରଗଡ଼ ଜିଲ୍ଲା ଭଟଲି ବ୍ଲକ୍ ଅନ୍ତର୍ଗତ କେଶାଇପାଲି ଉନ୍ନୀତ ଉଚ୍ଚ ବିଦ୍ୟାଳୟର ଛାତ୍ରୀ ଦିବ୍ୟାଶା ପଧାନ ଭାରତ ସରକାରଙ୍କ ବିଜ୍ଞାନ ଓ ପ୍ରଯୁକ୍ତି ବିଦ୍ୟା ବିଭାଗ ତଥା ଜାତୀୟ ନବପ୍ରବର୍ତ୍ତନ ପ୍ରତିଷ୍ଠାନ, ଭାରତଙ୍କ ମିଳିତ ଆନୁକୂଲ୍ୟରେ ନୂଆଁଦିଲ୍ଲୀର ପ୍ରଗତି ମୈଦାନରେ ଅନୁଷ୍ଠିତ ଏକାଦଶ ଜାତୀୟ ସ୍ତରୀୟ ପ୍ରଦର୍ଶନୀ ଓ ପ୍ରକଳ୍ପ ପ୍ରତିଯୋଗୀତାରେ ଅଂଶଗ୍ରହଣ କରିଥିଲେ।ଦୁଇ ଚକିଆ ଯାନରେ କି କି ଆନୁଷଙ୍ଗିକ ବ୍ୟବସ୍ଥା କଲେ ଅନେକ ସୁବିଧା ମିଳିପାରିବ ସେହି ଚିନ୍ତାଧାରା ଓ ଅଭିନବତା ବିଷୟରେ ସେ ପ୍ରଥମେ ବିଦ୍ୟାଳୟର ମାର୍ଗଦର୍ଶକ ବିଜ୍ଞାନ ଶିକ୍ଷୟିତ୍ରୀ ଶ୍ରୀମତୀ ସୁଚିସ୍ମିତା ପଧାନଙ୍କୁ ଜଣାଇ ତାଙ୍କ ମାର୍ଗ ଦର୍ଶନରେ ଏକ ପ୍ରକଳ୍ପର ରୂପରେଖ ପ୍ରସ୍ତୁତି କରିବାରେ ଲାଗିପଡିଲେ।

ପ୍ରକଳ୍ପକୁ କାର୍ଯ୍ୟକ୍ଷମ କରିବାରେ ସକ୍ଷମ ହେଲେ ଏବଂ ବରଗଡ଼ ଜିଲ୍ଲାସ୍ତରୀୟ ପ୍ରଦର୍ଶନୀରେ ତାଙ୍କ ଦ୍ଵାରା ପ୍ରସ୍ତୁତ ପ୍ରକଳ୍ପ ” ମଲ୍ଟି ପରପୋଜ୍ କେରିଅର୍ ଇନ୍ ଟୁ ହ୍ୱିଲର୍ ” କୁ ପ୍ରଦର୍ଶନ କରି କୃତକାର୍ଯ୍ୟ ହାସଲ କରିବା ସହିତ ରାଜ୍ୟସ୍ତରୀୟ ଓ ଜାତୀୟ ସ୍ତରୀୟ ପ୍ରଦର୍ଶନୀରେ ମଧ୍ୟ ଅଂଶ ଗ୍ରହଣ କରି ସଫଳତା ଅର୍ଜନ କଲେ। ଫଳ ସ୍ୱରୂପ ଜାପାନ ବିଜ୍ଞାନ ଓ ପ୍ରଯୁକ୍ତି ବିଦ୍ୟା ଏଜେନ୍ସି ଦ୍ବାରା ପରିଚାଳିତ ସାକୁରା ବିଜ୍ଞାନ ଉଚ୍ଚ ବିଦ୍ୟାଳୟ କାର୍ଯ୍ୟକ୍ରମରେ ଅଂଶଗ୍ରହଣ କରିବା ପାଇଁ ଯୋଗ୍ୟ ବିବେଚିତ ହୋଇଛନ୍ତି। ଏହି ସଫଳତାର ଶ୍ରେୟ ସେ ବିଦ୍ୟାଳୟର ବିଜ୍ଞାନ ଶିକ୍ଷୟିତ୍ରୀ ଶ୍ରୀମତୀ ସୁଚିସ୍ମିତା ପଧାନ, ପ୍ରଧାନ ଶିକ୍ଷକ ଶ୍ରୀଯୁକ୍ତ ଆତ୍ମାରାମ ଭୋଇ ଓ ସମସ୍ତ ଶିକ୍ଷକ ଶିକ୍ଷୟିତ୍ରୀ ବୋଲି କହନ୍ତି।

ଏହି ସଫଳତା ପାଇଁ ଭଟଲି ବିଧାୟକ ଇରାଶିଷ ଆଚାର୍ଯ୍ୟ,ଜିଲ୍ଲା ଶିକ୍ଷା ଅଧିକାରୀ ବିଶ୍ଵନାଥ ସାହୁ, ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଜ୍ୟୋତିକାନ୍ତ ସାହୁ ଏବଂ ବ୍ଲକ ଶିକ୍ଷା ଅଧିକାରୀ ସରୋଜ କୁମାର ଭୁଏ ,ଶିଶୁ ବୈଜ୍ଞାନିକ ଦିବ୍ୟାଶାଙ୍କ ସମେତ କେଶାଇପାଲି ବିଦ୍ୟାଳୟର ପ୍ରଧାନ ଶିକ୍ଷକ, ମାର୍ଗ ଦର୍ଶକ ବିଜ୍ଞାନ ଶିକ୍ଷୟିତ୍ରୀ ଏବଂ ଶିକ୍ଷକ ଶିକ୍ଷୟିତ୍ରୀମାନଙ୍କୁ ଶୁଭେଚ୍ଛା ଜଣାଇଛନ୍ତି।ଜଣେ ଶିକ୍ଷାର୍ଥୀ ଇନସ୍ପାୟାର୍ ଆୱାର୍ଡ଼ ପାଇ ସାକୁରା କାର୍ଯ୍ୟକ୍ରମରେ ଜାପାନ ଯିବା ଘଟଣା ଭଟଲି ବ୍ଲକ ପାଇଁ ପ୍ରଥମ ହୋଇଥିବାରୁ ଛାତ୍ରୀ ଦିବ୍ୟାଶା ଏବଂ ତାଙ୍କ ମାର୍ଗ ଦର୍ଶକ ବିଜ୍ଞାନ ଶିକ୍ଷୟିତ୍ରୀ ସୁଚିସ୍ମିତା ପଧାନଙ୍କୁ ବିଭିନ୍ନ ମହଲରୁ ପ୍ରଶଂସାର ସୁଅ ଛୁଟୁଛି।

Leave a Reply

Your email address will not be published. Required fields are marked *

error: Content is protected !!
Open chat
ଜୟ ଜଗନ୍ନାଥ 🙏🏻
ଶ୍ରୀକ୍ଷେତ୍ର ନ୍ୟୁଜକୁ ସ୍ୱାଗତ